54-ايڊهاڪ ليڪچرار مدو ختم ٿيڻ تي فارغ، توهين عدالت ٿي آهي: متاثر ليڪچرار

حيدرآباد(رپورٽ:فقير سليم) سنڌ حڪومت 54 ايڊهاڪ ليڪچرارن کي 31 آگسٽ 2010ع تي مدو ختم ٿيڻ تي فارغ ڪرڻ جو نوٽيفڪيشن جاري ڪري ڇڏيو، 31 آگسٽ تي جاري ٿيل نوٽيفڪيشن موجب ڄاڻايل ليڪچرار سنڌ پبلڪ سروس ڪميشن جو امتحان پاس نه ڪري سگهيا، جڏهن ته وزير اعليٰ پاران 18 مئي تي ڏنل ايڪسٽينشن پڻ 31 آگسٽ تي ختم ٿي رهي آهي، مدي مڪمل ٿيڻ بعد کين پگهارون ادا ڪري نه سگهبيون، لاڳاپيل ڊائريڪٽرن کي ضروري قدم کڻڻ لاءِ چيو ويو آهي، هوڏانهن متاثر ليڪچرارن دعويٰ ڪئي آهي ته هنن پاران ريگيولر ڪرڻ لاءِ سنڌ هاءِ ڪورٽ ۾ پٽيشن داخل ٿيل آهي، جنهن تي عدالت 26 آگسٽ تي اسٽي جاري ڪري سنڌ حڪومت کي اسان کي 31 آگسٽ تي فارغ ڪرڻ کان روڪيو هو، انهي باوجود کين برطرف ڪري عدالت جي حڪم جي توهين ڪئي وئي آهي، ٻئي طرف تعليم کاتي جي ايڊيشنل سيڪريٽري اقبال اعواڻ ڪاوش کي ٻڌايو ته ايڊهاڪ ليڪچرارن کي سنڌ جي وڏي وزير پاران آخري ڀيرو ڏنل ايڪسٽينشن 31 آگسٽ تي ختم ٿي وئي، جنهن بعد کين فارغ ڪيو ويو آهي، هن ٻڌايو ته اسان کي عدالت جو ڪو به اسٽي آرڊر نه مليو آهي، هوڏانهن سپلا جي مرڪزي اڳواڻ يعقوب چانڊيو ڪاوش سان ڳالهائيندي چيو ته ايڊهاڪ ليڪچرارن کي مستقل ڪرڻ بابت هاءِ ڪورٽ ۾ ڪيس هلندڙ آهي، عدالت پاران اسٽي آرڊر جاري ٿيڻ باوجود کين برطرف ڪرڻ عوامي حڪومت خلاف سازش آهي، هنن ايڊهاڪ ليڪچرارن کي بحال ڪرڻ جو مطالبو ڪيو.