مائٽن جي آمدني ڏسو، پوءِ ويهي فرمائشون ڪريو!

اڄڪلهه اڪثر نوجوان جڏهن پڙهائي لاءِ وڏن شهرن ڏانهن وڃن ٿا ته اتي بدليل ماحول ڏسي مائٽن کان ڳريون فرمائشون ڪن ٿا، جن کي پورو ڪرڻ وقت مائٽ ڪيترين تڪليفن مان گذرندا هوندا، ان جو اندازو شايد ئي نوجوانن کي هجي. جن جا والدين ٻني ٻارو ڪن ٿا، انهن کي کپي ته اهي پنهنجي والدين جي آمدني ڏسي پئسو خرچ ڪن، نه ڪي ٻين کي ڏسي وڏا وڏا شوق ڪجن. اسان جي معاشري ۾ اهڙا واقعا هاڻ معمول بڻجندا وڃن ته اگر ڪي غريب والدين پنهنجي ٻار جي فرمائش پوري نٿا ڪري سگهن ته سندن ٻار انتهائي قدم کڻڻ ۾ به دير نه ڪندو، ڪي نوجوان ته وري ان ڳالهه تان مائٽن سان اهڙي بدتميزي سان پيش ايندا آهن، جو مائٽ ويچارا سواءِ لڙڪ ڳاڙڻ جي ٻيو ڪجهه ڪري ناهن سگهندا، پر ڇا اهڙن نوجوانن کي ان ڳالهه جو احساس آهي ته سندن اهڙي عمل سان سندن والدين تان ڇا گذري ٿي؟ ڇا اسان کي اهو حق آهي ته اسان سڀ ڪجهه ڄاڻندي به پنهنجي والدين جي جذبات سان کيڏون؟! جيڪڏهن ڪنهن جا والدين پنهنجي پٽ کي موبائيل فون نٿا وٺي ڏئي سگهن ته ان نوجوان کي ضد ڪرڻ بجاءِ صبر ڪرڻ گهرجي، ڇو ته والدين جيڪو خرچ برداشت نه ٿا ڪري سگهن، انهن کي ڪنهن شيءِ لاءِ مجبور ڪبو ته اهي مجبور ٿي وياج تي قرض وٺندا يا پنهنجي اولاد جي خواهش پوري نه ڪري سگهڻ جي ڪري پريشان ٿيندا. ان ڳالهه ۾ ڪو به شڪ نه آهي ته جديد دور آهي، پر جديد دور ۾ پنهنجي آمدني کي ڏسي سادگي سان وقت گذارڻ  ۾ ڪو هرج به ته ناهي. اسان جي نوجوانن کي گهرجي ته جيڪڏهن سندن والدين انهن جون خواهشون پوريون نٿا ڪري سگهن ته اهي خود محنت ڪن، پنهنجي پڙهائي دوران فرصت جي لمحن ۾ ٽيوشن پڙهائين يا پارٽ ٽائيم جاب ڪري پنهنجو خرچ پاڻ پورو ڪن ته هڪ طرف هو پنهنجو ضرورتون به پوريون ڪري وٺندا، ٻئي طرف مائٽن تان به ڪجهه بار گهٽجي ويندو.

سنيل ڪمار مهيشوري/ڪراچي

حڪمرانن وٽ وقت ئي ناهي

پنهنجن حقن جي حاصلات لاءِ پرامن احتجاج ڪرڻ هر ماڻهو جو بنيادي حق آهي! اهڙي ئي حق جو استعمال نيشنل پروگرام فار امپروومينٽ آف واٽر ڪورسز جا ملازم گذريل ڪجهه ڏينهن کان ڪري رهيا آهن، پر خبر ناهي ته ڇو جمهوري دور جا حڪمران هنن ملازمن جا جائز مطالبا مڃڻ ته پري جي ڳالهه آهي، پر کين ٻڌڻ لاءِ به واندا ڪو نه آهن. ڪيترن ئي ڏينهن کان سوين ملازم ايم اين اي ماروي ميمڻ جي اڳواڻي ۾ پريس ڪلب ڪراچي آڏو ”پڪو ڪريو“ جي پڪار ڪري رهيا آهن، پر ڪو وس وارو، واڳ ڌڻي هنن وٽ لنگهي اچڻ جي ٿوري زحمت به مناسب نٿو سمجهي! جڏهن ته ٻئي پاسي سياسي اڳواڻ هنن ملازمن سان يڪجهتي جي اظهار طور پريس ڪلب پهتا. سڄي سنڌ ۾ قومپرستن ۽ ٻين پارٽين پاران هنن ملازمن کي پڪو ڪرڻ ۽ سندس جائز مطالبا مڃڻ لاءِ احتجاج ڪيو ويو، پر مجال آهي جي واڳ ڌڻين کي ذري جو به فڪر هجي! اسان صدر مملڪت کي گذارش ڪريون ٿا ته محترمه شهيد  بينظير ڀٽو ۽ عوام وچ ۾ جڙيل ان عظيم ”ٻنڌڻ“ جو ”ڀرم“ رکو ۽ ڪجهه عوام جي دردن ۽ سورن جو درمان ڪرڻ  جو سعيو ڪريو! سنڌ جي نوجوانن کان روزگار کسڻ بدران کين پڪو ڪيو وڃي.

عتيق ڪنڀر /عمرڪوٽ

مٽياري ضلعي ۾ وڌندڙ بدامني

گذريل ڪجهه مهينن کان ضلعي مٽياري ۾ بدامني جي باهه ٻريل آهي، ائين ٿو لڳي ڄڻ هن علائقي جو ڪو ڌڻي سائين نه آهي. ضلعي ۾ بدامني جو ڏهڪاءُ ايترو ته پکڙيل آهي، جو علائقي جا رهواسي پنهنجي جان، مال ۽ عزت کي محفوظ نه ٿا سمجهن، اهڙي بدامني ڪري هتان جي ڪيترن ئي رهواسين لڏپلاڻ شروع ڪري ڏني آهي ۽ هتان لڏي وڃي پنهنجي پاڙيسري ضلعي حيدرآباد کي آباد ڪيو آهي. ويجهي ماضي ۾ هي علائقو انتهائي پرامن رهيو آهي ۽ هتان جا ماڻهو سک سان زندگي گذاريندا هئا، پر جيئن ئي بدامني هن ضلعي ۾ پنهنجا قدم رکيا، تيئن ماڻهن پنهنجن اباڻن گهرن کي ڇڏڻ شروع ڪيو. هاڻي تازو ئي مٽياري جي مشهور سونارا بازار جي چورن ڀينگ ڪئي، ان سان گڏوگڏ علائقي جي ڪيترن ئي شريف ماڻهن جي دڪانن ۽ گهرن مان چوريون ٿيڻ سبب ماڻهن جون ننڊون ئي ڦٽي ويون آهن. نه صرف ايترو پر هن ضلعي جي روڊ رستن تان مسافرن کان ڦرون به معمول بڻيل آهن، پر افسوس جو هتان جي پوليس انتظاميا ڪنهن به قسم جي مثبت اڳڀرائي ناهي ڪئي، نه ئي چونڊيل نمائندن پنهنجي تڪ جي سار لڌي آهي. سنڌ حڪومت کي التجا آهي ته هتان جي عوام سان ٿيندڙ ويڌن جو سختي سان نوٽيس ورتو وڃي، ان سان گڏوگڏ پوليس انتظاميا کي شهر جي مختلف علائقن جي گشت جو پابند ڪيو وڃي، ته جيئن هن ضلعي ۾ وڌندڙ بدامني ختم ٿي سگهي ۽ ماڻهو پنهنجي علائقي ۾ خوشحالي سان زندگي گذاري سگهن.

نويد ميمڻ/مٽياري

ڪاري ڪامڻ جو موذي مرض ۽ سرڪار جي بي حسي!

هونئن ته سنڌ ۾ قسمين قسمين بيماريون وڻ ويڙهي جيان پيون وڌنديون وڃن، پر ڪاري ڪامڻ جهڙو موذي مرض هن وقت سڄي سنڌ ۾ غربت جيان پکڙيل آهي ۽ وڃي ٿو روز وڌندو، ان حوالي سان ضلعي نوشهرو فيروز جي صورتحال انتهائي خراب آهي، جتي شهرن توڙي ڳوٺن ۾ اهو موذي مرض خطرناڪ صورتحال اختيار ڪندو وڃي. ٺارو شاهه، ڀريا روڊ، ڀريا سٽي، جلباڻي شهر  ۽ ٻين شهرن ۽ ڳوٺن ۾ هزارين ماڻهو ڪاري ڪامڻ جي موذي مرض ۾ مبتلا آهن. هن ضلعي جي شهرن ۽ ڳوٺن جا غريب مسڪين ماڻهو هن خطرناڪ بيماري جي علاج جيترا پئسا نه هئڻ ڪري تڙپي تڙپي مري ٿا وڃن، پر هتي هن بيماري جي چڪاس ۽ ويڪسين لاءِ سرڪار ڪي به اپاءَ نه ورتا آهن. ٻين ضلعن ۾ هن بيماري جي ٽيسٽ ۽ ويڪسين مفت ڪئي وڃي ٿي،  پر هن ضلعي جي عوام جي واهر نه ڪرڻ وڏي ناانصافي آهي. اسان سنڌ سرڪار جي اعليٰ اختيارين کي گذارش ٿا ڪريون ته، ضلعي نوشهري فيروز جي هر ننڍي توڙي وڏي شهر ۽ ڳوٺ ۾ ڪاري ڪامڻ جي خاتمي لاءِ ڪئمپون لڳائي مفت ويڪسين جا انتظام ڪيا وڃن ۽ وڏن شهرن ۾ هر هيلٿ سينٽر ۾ هن بيماري جي ٽيسٽ ۽ علاج جو مفت بندوبست ڪيو وڃي ته جيئن وڌيڪ انساني حياتيون ضايع ٿيڻ کان بچي سگهن.

ساجد جلباڻي/جلباڻي

شهر (ڀريا سٽي)

اڳ ائين ڪڏهن ناهي ٿيو

روزاني ڪاوش ۾ 9 مارچ تي هائيڊ پارڪ ۾ ”سنڌ يونيورسٽي ۽ انجنيئرنگ جا ڪورس“ جي عنوان سان هڪ خط شايع ٿيو آهي، جنهن لاءِ وضاحت ڪجي ٿي ته سنڌ يونيورسٽي جي انسٽيٽيوٽ آف انفرميشن ۽ ڪميونيڪيشن ٽيڪنالاجي (آءِ آءِ سي ٽي) طرفان متعارف ڪرايل بي ايس اليڪٽرانڪس ۽ بي ايس ٽيلي ڪميونيڪيشن جا ڪورس گذريل ٽيهن سالن کان پڙهايا پيا وڃن، جڏهن ته آءِ آءِ سي ٽي مان ڊگري حاصل ڪندڙ شاگردن پاران ماضيءَ ۾ اهڙي ڪا به  شڪايت ڪونه ٿي آهي ته کين نوڪري حاصل ڪرڻ ۾ ڪو مسئلو درپيش آيو آهي. هي ڪورس بي ايس اليڪٽرانڪس ۽ بي ايس ٽيلي ڪميونيڪيشن، سائنس جا ڪورس آهن، جيڪي هاير ايجوڪيشن ڪميشن جا منظور ٿيل آهن. سنڌ يونيورسٽي جي وائيس چانسلر پروفيسر ڊاڪٽر نذير اي مغل پاران يونيورسٽي ۾ تدريس ۽ تحقيق ۾ سڌارا متعارف ڪرائڻ جي سلسلي ۾ جوڙيل ايگزيڪٽو ڪائونسل جي ٿيل اجلاس ۾ ڪاوش ۾  نشاندهي ڪيل مسئلي تي پڻ غور ڪيو ويو، ان سلسلي ۾ وڌيڪ وضاحت ڪجي ٿي ته آءِ آءِ سي ٽي جي ڊائريڪٽر پاران اجلاس کي ٻڌايو ويو ته ذڪر ڪيل ڊگري پروگرام وارن شاگردن کي نوڪري جي حوالي سان اڳ اهڙو ڪو به مسئلو سامهون نه آيو آهي، پر ان ڏس ۾ هن نشاندهي ٿيل مسئلي جي حل لاءِ عملي اپاءَ ورتا ويندا.

عبدالمجيد پنهور/پي آر او

(سنڌ يونيورسٽي)

The Kawish Group of Publication
B/2 Civil Line  Hyderabad,Sindh Pakistan.
Phone:+92 (22) 2780026,2780027,2780525   Fax: +92 (22) 2780772, 2781167
Email: kawish12@yahoo.com   ----     thekawish_hyd@yahoo.com