|
هوسڙي لڳ ٽينٽ سٽي قائم، هٽڙي ۾ به سٽي قائم ڪرڻ تي اتفاق حيدرآباد (رپورٽ:فقير سليم) حيدرآباد ضلعي حڪومت هوسڙي ويجهو 100 خيمن تي ٻڌل ٽينٽ سٽي قائم ڪري هٽڙي ۾ به هڪ ٻيو ٽينٽ سٽي قائم ڪرڻ تي اتفاق ڏيکاريو آهي، ٻئي طرف حيدرآباد پهچندڙ ٻوڏ متاثرن لاءِ سئٽزرلينڊ جي اداري سوئس هيومينٽيرينز پاران حيدرآباد ضلعي حڪومت کي 2 هزار خيما (ٽينٽ) ڏنا ويا، سئٽزرلينڊ جي ڄاڻايل اداري جو سينيئر ايگزيڪيوٽو ”عرس روبر“ پڻ حيدرآباد ۾ موجود آهي جيڪو ضلعي حڪومت پاران ٽينٽ سٽي قائم ڪرڻ لاءِ طئي ڪيل هنڌن جو پاڻ معائنو ڪري ٿو، جڏهن ته خيما کوڙائڻ وقت پڻ پاڻ نگراني ڪري ٿو، سوئس هيومينٽيرينز سان گڏ هلال احمر واري اداري پڻ ضلعي حڪومت کي ٽينٽ مهيا ڪيا آهن، ٻنهي ادارن جي ڏنل خيمن مان ضلعي حڪومت پاران هوسڙي ويجهو هڪ سئو خيمن تي مشتمل ٽينٽ سٽي قائم ڪئي آهي، جڏهن ته هٽڙي ڀرسان پڻ ٽينٽ سٽي قائم ڪرڻ لاءِ اي ڊي او روينيو برڪات رضوي ۽ ”عرس روبر“ جڳهه جو معائنو ڪيو، جنهن بعد هٽڙي ڀرسان 2 سئو خيمن تي ٻڌل ٽينٽ سٽي قائم ڪرڻ جو فيصلو ڪيو ويو، ان سلسلي ۾ ڪاوش پاران رابطو ڪرڻ تي حيدرآباد ضلعي جي رليف ۽ ريسڪيو آپريشن جي فوڪل پرسن اي ڊي او روينيو برڪات رضوي ٻڌايو ته ضلعي حڪومت وٽ متاثرن کي 4 کان 6 مهينا رهائڻ جا انتظام آهن پر هن وقت تائين حيدرآباد ۾ پهتل 40 هزار متاثرن مان جيڪب آباد، ٺٽي ۽ سکر ضلعن جا 1500 متاثر واپس موٽي ويا آهن، هن چيو ته ٻوڏ سٽيلن کي ٽينٽ سٽيز ۾ منتقل ڪرڻ تي غور ڪريون پيا، هن ٻڌايو ته ٽينٽ سٽي ۾ سموريون سهولتون فراهم ڪيون وينديون، هن چيو ته جيڪي متاثر واپس وڃڻ چاهين ٿا، انهن کي ٽرانسپورٽ جي مفت سهولت فراهم ڪري رهيا آهيون، جڏهن ته دادو مان متاثر آڻڻ لاءِ 50 گاڏيون موڪليون ويون. |
|
The Kawish Group of
Publication
|