گاجي کهاوڙ شهر ۾ 6 فوٽ پاڻي بيٺل، ڪيتريون ئي جايون ڊهي پيون:انتظاميا تحرڪ نه ورتو
گاجي کهاوڙ/وارهه (نمائندن وٽان) گاجي کهاوڙ شهر ۾ ٻوڏ جي پاڻي جي سطح 5 کان 6 فوٽن
تائين هجڻ کانپوءِ ڪالهه ٽن انچن جي لاٿ ٿي آهي، جڏهن ته شهر ۾ ٻوڏ کان بچيل گهرن ۾
رهيل شهرين جو کاڌ خوراڪ ختم ٿي چڪو آهي، جنهن سبب شهري بک ۾ پاهه ٿيڻ کانسواءِ
مختلف بيمارين ۾ وٺجي چڪا آهن، سرڪار سوڌو ڪنهن به اداري يا سياسي توڙي سماجي تنظيم
متاثر ماڻهن جي ڪا به پرگهور نه لڌي آهي، جڏهن ته ٻوڏ جي پاڻي سبب ڪيتريون ئي جايون
پٽ پئجي چڪيون آهن پر انتظاميا اڃا پاڻي جي نيڪال لاءِ ڪو به تحرڪ نه ورتو آهي،
جنهن ڪري وڏو نقصان ٿيڻ جو خدشو آهي، ان سلسلي ۾ گاجي کهاوڙ واسين نثار کهاوڙ، احمد
سولنگي، محمد نواز کهاوڙ ۽ ٻين چيو ته اسان انتظاميا کي بار بار آگاهه ڪيو آهي ته
پاڻي گاجي شهر کي کنڊر بڻائي پيو پر پاڻي کي رستو ڏيڻ لاءِ اڃا تائين ڪجهه به ناهي
ٿيو، جنهن ڪري وڌيڪ گهر ڊهڻ جو خطرو آهي، هنن چيو ته اسان پ پ ايم پي اي نجم الدين
ابڙو، ڊي سي او ۽ اعلى اختيارين کان مطالبو ڪريون ٿا ته فوري طور تي شهر تي توجهه
ڏئي پاڻي جو نيڪال ڪرڻ جو رستو ڳوليو وڃي ته جيئن تاريخي شهر کي بچائي سگهون.
The Kawish Group of
Publication
B/2 Civil Line Hyderabad,Sindh
Pakistan.
Phone:+92
(22) 2780026,2780027,2780525 Fax: +92 (22) 2780772,
2781167
Email:
kawish12@yahoo.com
----
thekawish_hyd@yahoo.com