دبئي ٽيسٽ جي پهرين ڏينهن بالرن جي بادشاهي، پاڪستان

99 رنسن تي ڍير، انگلينڊ 104 رنسن تي 6 وڪيٽون وڃائي ويٺي

دبئي (اسپورٽس ڊيسڪ) پاڪستان ۽ انگلينڊ وچ ۾ ٿيل ٽيسٽ سيريز جي آخري ميچ جو پهريون ڏينهن مڪمل طور تي بالرن جي نالي رهيو ۽ جڏهن راند ختم ٿي ته انگلش ٽيم پاڪستان جي پهرين اننگ 99 رنسن جي جواب 104 رنسن تي پنهنجا ٽاپ آرڊر بيٽسمين وڃائي ويٺي، دبئي اسٽيڊيم ۾ شروع ٿيل ميچ ۾ ڪالهه پاڪستاني ٽيم ۾ جنيد خان جي جاءِ تي اعزاز چيما کي شامل ڪيو ويو، جڏهن ته انگلينڊ ٽيم ۾ ڪابه تبديلي نه ڪئي وئي، پاڪستان ٽاس کٽي پهرين بيٽنگ جو فيصلو ڪيو، جيڪو پاڪستاني ٽيم کي مهانگو پئجي ويو، اسد شفيق کانسواءِ ڪوبه پاڪستاني بيٽسمين انگلش بالنگ جو ڄمي مقابلو نه ڪري سگهيو ۽ وقفي وقفي سان پويلين ويندا رهيا، پاڪستاني ٽيم کي پهريون نقصان ان وقت کڻڻو پيو جڏهن توفيق عمر بنا رنس ٺاهڻ جي جيمز اينڊرسن جي بال تي ايل بي ڊبليو ٿي ويو، ان بعد رانديگرن جي پويلين وڃڻ جي لائن لڳي وئي ۽ پاڪستان جون وڪيٽون سڪل پنن جيان ڪرڻ لڳيون، اظهر علي صرف هڪ رنس ٺاهي پويلين جي راهه ڏٺي، يونس خان 4 رنسن تي ڪرس براڊ جو نشانو بڻيو، حفيظ 13 رنسون ٺاهي آئوٽ ٿي ويو، سندس وڪيٽ به براڊ جي حصي ۾ آئي، مصباح رڳو هڪ رنس ٺاهي سگهيو، عدنان اڪمل 6 ۽ عبدالرحمان هڪ رنس ٺاهي آئوٽ ٿي ويو، اسد شفيق ذميواراڻي بيٽنگ ڪندي ڪنهن حد تائين ٽيم جي پوزيشن کي مستحڪم ڪيو، هن 45 رنسون ٺاهيون، هڪ موقعي تي پاڪستان جي اڌ ٽيم رڳو 21 رنسن عيوض واپس پويلين وڃي چڪي هئي، انگلش ٽيم طرفان ڪرس براڊ 4، جيمس اينڊرسن 3، مونٽي پنيسر 2 ۽ سران هڪ وڪيٽ ورتي، انگلش ٽيم جي شاندار بالنگ جي ڪري پاڪستاني ٽيم 99 رنسن تي ڍير ٿي وئي پر انگلش بيٽنگ جي شروعات به ڪجهه مختلف نه هئي ۽ ميچ ختم تائين 99 رنسن جي جواب ۾ 104 رنسن تي 6 رانديگر وڃائي ويٺي، انگلش ٽيم اسٽراس 41 رنسن سان ناٽ آئوٽ آهي، سعيد اجمل، عبدالرحمان ۽ عمر گل آڏو به انگلش بيٽسمين مقابلو نه ڪري سگهيا ۽ ڪڪ هڪ، پيٽرسن 32، اين بيل 5، مورگن 10 ۽ پرائر 6 رنسون ٺاهي آئوٽ ٿي ويا پاڪستان طرفان عبدالرحمان 3، عمر گل 2 ۽ سعيد اجمل هڪ وڪيٽ حاصل ڪئي، ياد رهي ته ٽيسٽ ڪرڪيٽ ۾ هي 14 هون موقعو آهي جو پاڪستاني ٽيم 100 رنسن کان به گهٽ رنسن جي مجموعي اسڪور تي ڍير ٿي وئي، پاڪستاني ٽيم رڳو 44.1 اوورن کي منهن ڏنو.

The Kawish Group of Publication
B/2 Civil Line  Hyderabad,Sindh Pakistan.
Phone:+92 (22) 2780026,2780027,2780525   Fax: +92 (22) 2780772, 2781167
Email: kawish12@yahoo.com   ----     thekawish_hyd@yahoo.com