|
ثبوت نه ملڻ تائين رانديگر بي قصور آهن، برطانوي اخبار تي ڪيس داخل ڪرڻ جو فيصلو وقت اچڻ تي ڪبو:اعجاز بٽ لنڊن/لاهور (اسپورٽس ڊيسڪ) پاڪستان ڪرڪيٽ بورڊ جو چيئرمين اعجاز بٽ لنڊن کان لاهور پهچي ويو، لاهور ايئرپورٽ تي ميڊيا سان ڳالهه ٻولهه ڪندي هن چيو ته جيستائين پاڪستاني ڪرڪيٽرن تي ڪو به الزام ثابت نٿو ٿئي، تيستائين انهن خلاف ڪا به ڪارروائي نه ڪئي ويندي، اسڪاٽ لينڊ يارڊ پاڪستاني رانديگرن کان 9 ڪلاڪ پڇا ڳاڇا ڪئي، 9 ڪلاڪ جاچ بعد به رانديگرن تي ڪو الزام ناهي لڳايو ويو، هڪ خانگي ٽي وي چينل سان ڳالهائيندي هن وڌيڪ چيو ته برطانوي اخبار نيوز آف دي ورلڊ تي ڪيس داخل ڪرڻ جو فيصلو وقت اچڻ تي ڪيو ويندو، اسان جي پاليسي زيرو ٽالرينس آهي، الزام ثابت ٿيڻ تائين ڪنهن به رانديگر خلاف ڪو به ايڪشن نه کنيو ويندو، جنهن به رانديگر خلاف ڪو به الزام ثابت ٿيو ته ان خلاف سخت ڪارروائي ڪئي ويندي، جيستائين ڪو به ٺوس ثبوت نٿو ملي، تيستائين رانديگر بي قصور آهن، جڏهن ته لاهور ايئرپورٽ تي شهرين پي سي بي چيئرمين، ڪرڪيٽ بورڊ ۽ رانديگرن خلاف احتجاج ڪري اعجاز بٽ مرده باد، ڪرڪيٽ بورڊ مرده باد ۽ ميچ فڪسنگ ۾ ملوث رانديگر مرده باد جا نعرا هڻندا رهيا، هوڏانهن پاڪستاني رانديگرن جي اسپاٽ فڪسنگ ۾ ملوث هجڻ جو انڪشاف ڪندڙ مظهر مجيد پاڪستاني رانديگرن کانپوءِ پي سي بي جي عملدارن تي به الزام لڳايو آهي ته اسپاٽ فڪسنگ اسڪينڊل ۾ صرف پاڪستاني رانديگر نه پر پاڪستان ڪرڪيٽ بورڊ جا ڪيترائي عملدار ملوث آهن، هن چيو ته هو جلد ئي هڪ ٻي حيران ڪندڙ رپورٽ منظر عام تي آڻيندو، جنهن ۾ بورڊ جي ڪيترن ئي عملدارن جا ان عمل ۾ ملوث هجڻ جا ثبوت پيش ڪيا ويندا. |
|
The Kawish Group of
Publication |