آتم ميگهواڙ

مٿس ڏکيو وقت ڇا آيو آهي، سڀئي دوست هٿ ڪڍي ويا آهن، نه پنهنجي ئي عرب دنيا سندس پٺڀرائي ڪري ٿي ۽ نه ئي وري آفريڪي ملڪ يا پاڪستان جهڙا دوست سندس ڀرجهلو ٿين ٿا،  چون ٿا ته ڪرنل معمر قذافي جو اقتدار بلڪل پڄاڻي تي پهچڻ وارو آهي ۽ لبيا ۾ باغين جي حڪومت قائم ٿيڻ واري آهي، جيتوڻيڪ قذافي خلاف اٿيل باغين جي ان تحريڪ کي آمريڪا، اولهه ۽ يورپ سميت  عرب دنيا جا ملڪ انقلابي تحريڪ قرار ڏئي رهيا آهن پر جيڪي ڏاهپ جو ماسو به رکن ٿا تن جو خيال آهي ته اها اصل ۾ آمريڪا جي سازش آهي ۽ هاڻ لبيا ۾ جهڙي نموني تبديلي اچي رهي آهي اها لبيا جي عوام جي بدقسمتي آهي، هونئن ته اها کليل حقيقت آهي ته ڪرنل قذافي هڪ فوجي ڊڪٽيٽر آهي، ڇاڪاڻ ته هن پهرين سيپٽمبر 1969ع تي لبيا جي بادشاهه ادريس پهرئين جو تختو اونڌو ڪري اقتدار تي قبضو ڪيو، ڪرنل قذافي کي ان وقت فوج جي آفيسرن جي هڪ ننڍي گروپ جي حمايت حاصل هئي، انهن ان وقت اقتدار تي قبضو ڪيو جڏهن بادشاهه ادريس پنهنجي علاج لاءِ مصر ويل هو ۽ ملڪ جون واڳون شهزادي سعيد حسن الردا المهدي سنوسي جي حوالي ٿيل هيون، ان وقت قذافي جي اقتدار تي اهڙي نموني ٿيل قبضي کي فوجي انقلاب جو نالو ڏنو ويو ۽ بنا ڪنهن رت وهڻ جي قذافي لبيا جو حڪمران بڻجي ويهي رهيو، هن وقتي بادشاهه سعيد حسن الردا کي گرفتار ڪري ورتو، جيتوڻيڪ قذافي ملڪ جو طاقتور حڪمران بڻجي ويو پر هن پنهنجي رينڪ ڪرنل کان پاڻ کي جرنل تائين ترقي ڏني، اها هڪ منفرد ڳالهه آهي ته فوجي اوور ٽيڪ کانپوءِ هڪ ڪرنل اقتدار سنڀاليو، عام طور تي جيڪي به ملٽري چيف هوندا آهن اهي ملڪ تي قابض بڻجي اقتدار سنڀاليندا آهن، ڪرنل قذافي شروع کان وٺي آمريڪا مخالف لابي ۾ شامل رهيو ۽ جڏهن پاڪستان ۾ شهيد ذوالفقار علي ڀٽو وزيراعظم ٿيو ته هنن ٻنهي دوستن مسلم دنيا کي گڏ ڪري طاقتور بڻائڻ لاءِ سٺو ڪم ڪيو، سعودي بادشاهه شاهه فيصل به ساڻس گڏ هو، اهي ٽيئي دوست هئا جن جي اهڙي سوچ آمريڪا کي پسند نه آئي،  ذوالفقار علي ڀٽو جو ان وقت ئي تختو اونڌو ڪري کيس شهيد ڪيو ويو، ڪنگ فيصل کي پنهنجي ئي ڀائٽي هٿان مارايو ويو، ڪرنل قذافي خلاف ڪيتريون ئي سازشون ڪيون ويون پر هو مڙس ماڻهو بڻجي منهن ڏيندو رهيو، قذافي نه رڳو فوجي بڻجي اقتدار تي ويٺو رهيو  پر هن پنهنجي ملڪ کي ترقي ڏيارڻ ۾ وڏي جدوجهد ڪئي، لبيا مان تيل وڏي مقدار ۾ نڪري ٿو، جنهن ڪري قذافي پنهنجي ملڪ جا معاملا هلائڻ لاءِ مالي حوالي سان ڪنهن جي به ڪاڻ نه ڪڍي ۽ نه ئي ڪنهن اڳيان هٿ ٽنگيو پر هن ملڪ جي عوام کي ايترو ته مضبوط ڪيو جو اتي ڪوبه بيروزگار نه بچيو، صحت جون سهولتون عوام کي مفت فراهم ڪيون ويون پر ان هوندي به قذافي خلاف ٿيندڙ سازشون مضبوط ٿينديون ويون، تازو جڏهن هلندڙ سال جي شروعات ڌاري تيونس ۽ مصر ۾ انقلاب لاءِ ماڻهو اٿي پيا هئا تڏهن لبيا ۾ به باغين جو گروپ سامهون آيو، 15 فيبروري 2011ع تي لبيا جون حالتون خراب ٿي ويون، جنهن کي روڪڻ لاءِ ڪرنل قذافي پنهنجي طاقت جو استعمال ڪيو، باغين جي اها تحريڪ ڪجهه ئي ڏينهن اندر سڄي ملڪ اندر پکڙجي وئي جنهن مان اهو محسوس ٿي رهيو آهي ته اها تحريڪ هلائڻ لاءِ اڳ ۾ ئي تياريون ٿيل هيون، انقلاب جي نالي تي پاڻ کي باغي سڏائيندڙن جي ان ڪهاڻي جو اسڪرپٽ اڳ ۾ ئي لکجي چڪو هو، باغين جي تحريڪ ۾ پڙهيل لکيل نوجوان، وڪيل، استاد، شاگرد ۽ آئل فيلڊن جا ورڪر شامل ٿي ويا ۽ انهن هڪ اسلامي گروپ ”لبين اسلامڪ فائٽنگ گروپ“ جي نالي سان ٺاهي ورتو، ماضي جي تاريخ جو جائزو وٺبو ته دنيا ۾ آمريڪا مخالف ملڪن ۾ جتي به انقلاب آيا آهن اتي جي ڪجهه نوجوانن جو گروپ جوڙي ان جي برين واشنگ ڪئي وڃي ٿي، يعني سندن ذهن کي ڦيرايو وڃي ٿو، ائين ڪجهه ذهن تبديل ٿئي ٿو ۽ ڪجهه وري پئسو ڪمال ڏيکاري ٿو، آمريڪا جڏهن ڊالرن جي صورت ۾ انهيءَ باغي گروپ جي مدد ڪئي ۽ ان لاءِ وسيلا به فراهم ڪيا، باغين جڏهن تريپولي ۽بن غازي توڙي طرابلس ۾ داخل ٿيڻ جي ڪوشش ڪئي ته وٽن اهڙا ڳرا ۽ جديد هٿيار هئا جيڪي ڏسي ماڻهو حيرت ۾ وٺجي ويا، کين گاڏيون به فراهم ٿي ويون، هٿيار به ملن ٿا ۽ کاڌو به فراهم ٿئي ٿو، ان سموري ڪم تي ايندڙ خرچ ڪير ڪري ٿو؟ پر اها ڳالهه لڪل ناهي، هڪ کليل ڪتاب جيان آهي ته آمريڪا پنهنجي مخالف حڪمرانن جي ملڪن ۾اهڙيون تبديليون آڻڻ لاءِ حڪومت خلاف بغاوت ڪندڙ گروپن جي وڏي مالي ۽ فوجي مدد ڪندو رهيو آهي، ٺيڪ اهڙي طرح عراق ۾ به ٿيو آهي، جتي باغين کي مضبوط بڻائڻ لاءِ نيٽو جي فوج شروع کان وٺي سندن مدد ڪئي، جڏهن باغي تريپولي، بن غازي ۽ طرابلس جي ٻاهران پهتا ته نيٽو جي جهازن شهرن ۾ خاص ٺڪاڻن تي حملا ڪرڻ شروع ڪري ڏنا، قذافي  جي محل تي ميزائل فائر ڪيا ويا ۽ بمباري ڪئي وئي پر قذافي سرڪار باغين کي پٺتي ڌڪي ڇڏيو، باغي اها ڳالهه مڃين ٿا ته کين نيٽو فوج جي مدد حاصل آهي، اهڙي طرح هاڻي جڏهن باغين طرابلس جي گهٽين ۾ ٻيهر داخل ٿي قذافي سرڪارکي مفلوج بڻائي پنهنجي حڪومت قائم ٿيڻ جو اعلان ڪيو آهي تڏهن عرب ليگ باغين جي حڪومت کي فوري طور تي تسليم ڪري ڄڻ ته ڪرنل قذافي کان لاتعلقي جو  اظهار ڪيو آهي، قذافي جا جيڪي پراڻا دوست ملڪ يا اڳواڻ آهن يا انهن جا سربراهه آهن اهي به اڄڪلهه خاموش آهن، ڪٿان به قذافي جي حق ۾ ڪو نعرو بلند نه ٿي رهيو آهي، باغين طرابلس ۾ قذافي جي هيڊڪوارٽر تي پنهنجو جهنڊو ڦڙڪائي ڇڏيو آهي پر اڃا به سندس ملڪ تي مڪمل ڪنٽرول حاصل نه ٿيو آهي،  ڇاڪاڻ ته سرڪاري ٽي وي ۽ طرابلس توڙي لبيا جا ڪجهه علائقا اڃا به قذافي جي ڪنٽرول ۾ آهن، جيتوڻيڪ باغين طرابلس ۾ داخل ٿيڻ جي ٻئي ڏينهن اها دعويٰ ڪئي ته قذافي جي ٻن پٽن سيف الاسلام ۽ محمد کي گرفتار ڪري ورتو آهي پر ٻئي ڏينهن سيف الاسلام پنهنجي حامين جي هجوم ۾ منظرعام تي اچي باغين جي اهڙي دعويٰ کي ڪوڙي ثابت ڪيو، جڏهن به ڪو حڪمران ڪمزور ٿيندو آهي ته سندس سرڪار جا ملازم به عجيب نموني جا پلٽا کائيندا آهن، جيئن باغين طرابلس تي قبضو ڪيو آهي ته اسلام آباد ۾به لبيا جي سفارتخاني تي باغين جو جهنڊو ڦڙڪايو ويو آهي، جڏهن ته پاڪستان سرڪار اڃا تائين باغين جي حڪومت کي تسليم نه ڪيو آهي، اهڙي صورتحال ۾ لبيا جي سفارتخاني تي باغين جو جهنڊو ڦڙڪائڻ وارو عمل سفارتي آدابن جي دائري ۾ ته نٿو اچي ۽ اهو غير قانوني عمل آهي. باغين جي شروع کان وٺي آمريڪا ۽ اولهه توڙي يورپ جا ٻيا طاقتور ملڪ کليل حمايت ڪري رهيا آهن، انهن جو چوڻ آهي ته اهي باغي حق ۽ سچ جي رستي تي آهن، باغين کي مضبوط بڻائڻ ۽ مختلف علائقن تي قبضو ڪرڻ لاءِ رستو ٺاهي ڏيڻ لاءِ نيٽو فوج اڳواٽ اتي بمباري ڪري ٿي، ميزائل فائر ڪيا وڃن ٿا ۽ پوءِ باغي اڳتي وڌن ٿا، هينئر به جڏهن طرابلس ۾ باغي داخل ٿي رهيا هئا تڏهن سندن اڳيان نيٽو جا عام ڊريس وارا فوجي هئا، جيڪي سخت ويڙهه ڪري اڳتي وڌي رهيا آهن ۽ انهن سان گڏ باغي به انهن علائقن تي قبضو ڪندا پيا وڃن، قذافي جي پٽ سيف الاسلام جو چوڻ آهي ته باغي سندن گهيري ۾ اچي ويا آهن ۽ هو کين سبق سيکاريندا، جڏهن ته قذافي جي محل تي به باغين جو قبضو ٿي ويو آهي، اهڙي صورتحال ۾ ڪا واضح صورتحال نه جڙي رهي آهي ته آخر فتح ڪنهن جي پئي ٿئي پر جيستائين ڪرنل قذافي ۽ سندس پٽن کي گرفتار نٿو ڪيو وڃي يا سندن زندگيون سلامت آهن تيستائين باغين جي حڪومت قائم ٿي وڃڻ واري ڳالهه قطعي نه هوندي، ڇاڪاڻ ته ڪرنل قذافي سان گڏ به وڏي فوج آهي ۽ اها هينئر طرابلس جي گهٽين ۾ باغين سان سخت ويڙهه وڙهي رهي آهي، جيئن عراق ۾ آمريڪا قبضو ڪري صدام حسين جو انجام آندو ائين ئي هو لبيا ۾ قذافي جي پڄاڻي چاهي ٿو. ظاهر آهي ته آمريڪا پاڻ سپر پاور آهي ۽ ان سان گڏ دنيا جون وڏيون طاقتون به آهن ته پوءِ اها ڳالهه پڪ جي حد تائين چئي سگهجي ٿي ته اڄ نه ته سڀاڻي قذافي جو لبيا تان ڪنٽرول مڪمل طور تي ختم ٿي ويندو ۽ باغي اقتدار تي قابض بڻجي ويهي رهندا، ان کانپوءِ ويڙهه جي نظر ٿي ويل لبيا جي صورتحال ڪهڙي هوندي ۽ جيڪو نقصان ٿيو آهي ان جو ازالو ڪيئن ٿيندو، اهو ايندڙ وقت ئي ٻڌائيندو.